पुन्य वार्ता
अकोले, प्रतिनिधी:
11 डिसेंबर: संगमनेर तालुक्याचे नवनिर्वाचित आमदार मा. श्री. अमोल खताळ यांनी आज अकोले येथील दैनिक समर्थ गांवकरी च्या कार्यालयाला भेट दिली. त्यांच्या या भेटीच्या निमित्ताने महाराष्ट्र राज्य पत्रकार संघाच्या वतीने त्यांचा भव्य सत्कार समारंभ आयोजित करण्यात आला. यावेळी आमदार खताळ यांना विठ्ठलाची मूर्ती, खारीक-खोबऱ्याचा हार, डायरी, हरिपाठ, घड्याळ आणि पुष्पगुच्छ देऊन सन्मानित करण्यात आले. हा सन्मान महाराष्ट्र राज्य पत्रकार संघाचे राज्य सरचिटणीस डॉ. विश्वासराव आरोटे यांच्या हस्ते करण्यात आला. ह्यावेळी दैनिक समर्थ गांवकरी अंकाचे प्रकाशन आमदार अमोल खताळ व संपादक डॉ. विश्वासराव आरोटे यांच्या हस्ते करण्यात आले.
कार्यक्रमाला मान्यवरांची उपस्थिती,
सत्कार समारंभात महाराष्ट्र राज्य पत्रकार संघाचे अनेक पदाधिकारी, कार्यकर्ते आणि स्थानिक नेते उपस्थित होते. प्रमुख उपस्थित मान्यवरांमध्ये महाराष्ट्र राज्य पत्रकार संघाचे उत्तर नगर जिल्हाध्यक्ष सोमनाथ काळे, संगमनेर तालुका उपाध्यक्ष स्वानंद चत्तर, अकोले तालुका अध्यक्ष अशोकराव उगले, तसेच अकोले तालुका एज्युकेशन सोसायटीचे अध्यक्ष सुनील दातीर यांचा समावेश होता.
याशिवाय राष्ट्रवादी काँग्रेसचे ज्येष्ठ नेते शिवाजीराव नाईकवाडी मामा, अगस्ती पतसंस्थेचे उपाध्यक्ष गणेश पापळ, अकोले नगरपंचायतचे नगराध्यक्ष बाळासाहेब वडजे, खरेदी-विक्री संघाचे संचालक नानासाहेब नाईकवाडी, उद्योजक इंजि. निलेश गायकर यांसह अनेक मान्यवर कार्यक्रमाला उपस्थित होते.
आमदार अमोल खताळ यांचे विचार,
सत्कारानंतर आपल्या भाषणात आमदार अमोल खताळ यांनी पत्रकारांच्या महत्त्वपूर्ण भूमिकेवर भर दिला. “पत्रकार हा लोकशाहीचा चौथा आधारस्तंभ आहे. हा आधारस्तंभ मजबूत आणि भक्कम राहण्यासाठी आम्ही पत्रकारांच्या मागे ठाम उभे राहू. पत्रकारांसाठी जे काही सहकार्य आवश्यक असेल ते आम्ही नक्की करू,” असे त्यांनी सांगितले.
पत्रकारांच्या समस्यांवर चर्चा,
महाराष्ट्र राज्य पत्रकार संघाने पत्रकारांच्या समस्यांकडे आणि मागण्यांकडे सरकारचे लक्ष वेधण्यासाठी नागपूर ते मुंबई अशी संवाद यात्रा आयोजित केली होती. या यात्रेच्या माध्यमातून पत्रकारांसाठी 24 मागण्या मांडण्यात आल्या होत्या.
पत्रकार संघाच्या वतीने आमदार खताळ यांना या संवाद यात्रेबाबतची माहिती देण्यात आली. यात पत्रकारांसाठी स्वतंत्र महामंडळ स्थापनेची मागणी करण्यात आली आहे. या महामंडळामुळे पत्रकारांना आर्थिक सुरक्षा, विमा संरक्षण आणि सामाजिक सुरक्षा योजनांचा लाभ मिळेल, असे पत्रकार संघाच्या वतीने सांगण्यात आले.
तसेच, प्रलंबित 22 मागण्या लवकर पूर्ण करण्यासाठी सरकारकडे ठाम मागणी करण्यात आली आहे. यामध्ये स्थिर वेतन योजना, निवृत्ती वेतन, आरोग्य विमा, अपघात विमा, गृहनिर्माण योजना, तसेच पत्रकारांच्या कुटुंबीयांसाठी शिष्यवृत्ती योजना यांचा समावेश आहे.
महामंडळाच्या स्थापनेचा लाभ,
वृत्तपत्र विक्रेत्यांसाठी स्वतंत्र महामंडळ स्थापन झाल्यामुळे त्यांना काही सुविधा मिळाल्या आहेत. मात्र, ग्रामीण भागातील पत्रकारांसाठी आणखी उपाययोजना करण्याची आवश्यकता असल्याचे मत उपस्थितांनी मांडले.
पुस्तिकेचे वितरण,
कार्यक्रमाच्या शेवटी संवाद यात्रेची एक विशेष पुस्तिका आमदार अमोल खताळ यांना प्रदान करण्यात आली. या वेळी उपस्थित मान्यवरांनी महामंडळाच्या माध्यमातून पत्रकारांच्या हितासाठी प्रभावी निर्णय घेतले जातील, असा विश्वास व्यक्त केला.
कार्यक्रम यशस्वीरीत्या पार पाडण्यासाठी पत्रकार संघाच्या सर्व पदाधिकाऱ्यांनी परिश्रम घेतले. कार्यक्रमानंतर उपस्थित मान्यवरांनी पत्रकार संघाच्या कार्याचे कौतुक केले.
