पुन्य वार्ता
ब्राम्हणवाडा, प्रतिनिधी:
अहिल्यानगर जिल्ह्यातील बोटा ते ब्राम्हणवाडा हा रस्ता अत्यंत खराब स्थितीत असून, प्रशासनाच्या दुर्लक्षामुळे नागरिकांचे हाल सुरू आहेत. पुणे-नाशिक महामार्गालगत असलेल्या या रस्त्याचे काही भागात डांबरीकरण व रुंदीकरण झाले असले, तरी बहुतांश भाग पूर्णतः खराब आहे. ठिकठिकाणी मोठे खड्डे, उखडलेले साईड पट्टे, आणि ओव्हरलोड डंपरची वाहतूक यामुळे हा रस्ता अक्षरशः मृत्यूचा सापळा बनला आहे.
रस्त्याची परिस्थिती :
बोटा गावापासून सुरुवातीला १ किलोमीटर चांगला रुंद व डांबरी रस्ता आहे. त्यानंतर निकृष्ट दर्जाच्या कामामुळे खराब झालेला रस्ता आहे, जो अतिशय धोकादायक ठरत आहे. काही भागात नुकतेच डांबरीकरण झाले होते, परंतु आता तो रस्ता पूर्णतः मोडकळीस आला आहे.
अनेक ठिकाणी अर्धा ते एक फूट खोल खड्डे पडले आहेत. साईड पट्ट्यांचे बांधकाम निकृष्ट दर्जाचे असल्यामुळे ते उखडले आहेत. काही महिन्यांपूर्वी रस्त्याच्या दुरुस्तीसाठी काम सुरू झालेहोते, मात्र ते अचानक थांबले. स्थानिक प्रशासन, बांधकाम विभाग आणि ठेकेदार यांचे उपहासात्मक दुर्लक्ष सुरूच आहे.
डंपर वाहतुकीमुळे रस्त्याची दुरवस्था:
या रस्त्यावर खडी क्रशर कारखाने मोठ्या प्रमाणात आहेत. त्यामुळे ओव्हरलोड डंपर वाहतूक मोठ्या प्रमाणात सुरू असून, रस्त्याचा दर्जा दिवसेंदिवस खालावत चालला आहे. रस्ता अत्यंत अरुंद असूनही जड वाहने सतत या मार्गावरून धावतात. डंपरमुळे रस्त्यावर मोठ्या प्रमाणात खड्डे पडले आहेत, त्यामुळे दुचाकी आणि चारचाकी वाहनधारकांसाठी प्रवास धोकादायक बनला आहे. प्रशासन आणि पोलिसांचे डोळेझाक धोरण : ओव्हरलोड वाहतुकीवर कोणतेही बंधन नाही.
रस्त्याची दुरवस्था इतकी भीषण आहे की, या मार्गावर महाराष्ट्र राज्य परिवहन मंडळाची (एसटी) बसदेखील व्यवस्थित चालत नाही. त्यामुळे स्थानिक नागरिक, विद्यार्थी, शेतकरी आणि इतर प्रवाशांना मोठ्या अडचणींचा सामना करावा लागत आहे.
निवडणुका संपल्या पण विकासाचे वचन हवेतच?
बोटा ते ब्राम्हणवाडा हा रस्ता गेल्या अनेक वर्षांपासून दुरुस्तीसाठी प्रलंबित आहे. निवडणुकीच्या काळात दिलेल्या आश्वासनांची आठवण नागरिकांना आता होते आहे. अकोले तालुक्याचे आमदार डॉ. किरण लहामटे या समस्येकडे लक्ष देतील का? हा मोठा प्रश्न स्थानिक नागरिकांना सतावत आहे.
नागरिकांची मागणी:
- बोटा ते ब्राम्हणवाडा संपूर्ण रस्ता तातडीने दुरुस्त करावा.
- निकृष्ट काम करणाऱ्या ठेकेदारावर कारवाई करावी.
- ओव्हरलोड डंपर वाहतुकीवर नियंत्रण आणावे.
- रस्त्याच्या गुणवत्तेची तपासणी करून नव्याने डांबरीकरण करावे.
स्थानिक नागरिक संतप्त:
रस्त्याच्या या दुरवस्थेमुळे नागरिक प्रचंड त्रासले आहेत. जर लवकरच या रस्त्याच्या कामाला सुरुवात झाली नाही, तर स्थानिक नागरिक मोठे आंदोलन उभारतील, असा इशारा त्यांनी दिला आहे.
शासन आणि संबंधित विभागाने याकडे तत्काळ लक्ष द्यावे, अशी नागरिकांची मागणी आहे. बोटा ते ब्राम्हणवाडा रस्त्याचे भवितव्य काय? प्रशासन सुधारणा करणार की दुर्लक्षच करणार? हे येत्या काळात स्पष्ट होईल.
